surigaodigitalnewsPormal nang giabrihan ang Bureau Immigration Satellite Office sa lungsod sa General Luna, Siargao Island niadtong Marso 12 aron mas mapahapsay pa ang mga proseso sa imigrasyon ug pagpalig-on sa sektor sa turismo sa isla.
Kini nga lakang, nga gipangunahan ni Surigao del Norte District 1 Congressman Bingo Matugas ug kanhi gobernador Atty. Francisco “Lalo” Matugas, nagtubag sa mga panginahanglanon sa nag-uswag nga pagdagsa sa mga turista sa isla.
Tungod niini nga kalamboan, dili na mabug-atan ang mga turista ug lokal sa kahasol sa pagbiyahe sa Manila alang sa pagproseso sa visa o sa mga dagkong lungsod sa Mindanao sama sa Butuan City, Davao City, Cagayan de Oro, ug General Santos City. Uban sa real-time nga koneksyon sa national database, ang opisina sa BI nagsiguro sa paspas ug episyente nga resolusyon kabahin sa imigrasyon, ug nagpauswag sa kinatibuk-ang kasinatian sa mga bisita ug mga residente.
Ang proactive initiative ni Department of Jusice Secretary Boying Remulla, sa pakigtambayayong ni Atty. Lalo Matugas, nagpasiugda sa kaayohan ug kaharuhay sa mga turista.
Sumala sa Department of Tourism (DOT), ang Siargao midawat og 529,000 ka mga turista niadtong tuig 2023, usa ka dakong pag-uswag gikan sa pre-pandemic nga numero nga 272,000 niadtong 2019.
Ang pagtukod sa buhatan sa Bureau of Immigration sa General Luna nagrepresentar sa usa ka estratehikong pamuhunan sa imprastraktura sa turismo sa Siargao. Pinaagi sa pagpasayon sa hapsay nga proseso sa imigrasyon ug pag-akomodar sa mga panginahanglan sa nagkadaghang bisita, kini nga inisyatiba nagtakda sa entablado alang sa padayon nga kauswagan ug pag-ila sa tibuok kalibotan.
Surigao Digital News 2
