Mga proyekto sa irigasyon, giturn-over sa Siargao Island

Bag-ohay lang, gipahigayon ang usa ka Mass Turn-Over Ceremony para sa tulo ka Solar Powered Pump Irrigation Projects ug usa ka Communal Irrigation Project diin kini malampusong nahitabo sa Sta. Paz IA Hall, Brgy. Sta. Paz, San Isidro, Surigao del Norte.

Gilauman karon sa mga mag-uuma ang pag-ani sa humay dili lang kausa sa usa ka tuig, kundili kaduha, tungod kay aduna na sila’y masaligan nga tinubdan sa tubig alang sa irigasyon para sa ilang mga umahan gawas sa tubig gikan sa ulan.

Ang mahinungdanong seremonya nakapahimulos sa 192 ka mga mag-uuma nga adunay 243 ka ektarya nga service area gikan sa mga munisipyo sa San Isidro, San Benito, Del Carmen ug Sta. Monica, nga tanan nahimutang sa iladong tourist attraction, ang Siargao Island.

Gipasiugda ni Regional Manager Ruby C. Tuan Jr., NIA – Caraga ang kahinungdanon sa pagpadayon sa regular nga komunikasyon sa National Irrigation Administration ug uban pang mga ahensya sa gobyerno aron magpadayon nilang magamit ang daghang kapuslanang plano, programa, ug serbisyo.