Turismo sa Siargao 323% ang Pagsaka

Niadtong 2023, ang Siargao, ang nanguna nga surfing destination sa nasud, nakasinati og 323.56% nga pagtaas sa datos sa pagpangabot sa mga turista isla human sa pila ka tuig nga pag-ubos tungod sa epekto sa pandemya ug sa Super Typhoon Odette sa turismo sa isla.

Sumala sa datos sa Department of Tourism-Caraga, ang Siargao nakatala og 529,822 nga tourist arrivals niadtong tuig 2023; misaka kini gikan sa 125,088 ka mga turista lamang niadtong 2022. Gikan niini nga mga turista, 476,074 ang domestic, ug 53,748 ang langyaw diin 511.89% nga pagtaas niini gikan sa 8,784 niadtong 2022.

Dugang pa sa DOT-Caraga, sa wala pa ang epekto sa COVID-19 niadtong 2019, ang isla nakatala og 257,900 ka nga tourist arrivals. Ingon ni DOT-Caraga Director Ivonnie Dumadag nga nakatampo ang accessibility sa maong isla sa pagsaka sa datos sa tourist arrivals. 

Sigon pa ni Dumadag nangandam na ang ahensya sa mas dako pa nga pagdagsa  karong tuig 2024.

2024 Siargao International Surfing Cup QS 5,000

Si Surigao del Norte 1st District Representative Francisco Jose “Bingo” Matugas II niingon nga nagpadayon usab ang pagpangandam alang sa pag-host sa isla sa Siargao International Surfing Cup karong tuig 2024, nga gi-upgrade ngadto sa sa 5,000 Qualifying Series (QS) gikan sa 3,000 QS category sa milabay nga tuig 2023.

Ang Siargao International Surfing Cup 5,000 QS, nga gi-sanction sa World Surf League, nagtumong sa pagdani sa labing maayong mga surfers gikan sa tibuok kalibutan nga moapil sa kompetisyon tungod sa mas taas nga premyo ug sa nagkadaghang puntos.

Niadtong 2023, ang Siargao niranggo sa ika-10 sa labing maayong isla sa Asya sa Condé Nast Traveler’s Readers’ Choice Awards.

^{Photo Credits from Traveloka}