UN, Surigao City nagbukas og model unit sa balay para sa mga Sama-Badjaus
BUTUAN CITY —Ang United Nations Habitat Philippines (UN-Habitat) ug ang gobyerno sa Surigao City nagbukas karong Lunes sa unang model unit sa balay para sa mga residente nga Sama-Badjau sa siyudad.
Ang model unit sa balay, usa ka quadruplex nga pwede maka-accommodate og upat ka pamilya, gibuksan ug giturn-over sa mga pamilya nga Sama-Badjau nga benepisyaryo.
Si UN Resident Coordinator sa Pilipinas nga si Gustavo Gonzales ug si Mayor sa Surigao City nga si Pablo Yves Dumlao II ang naghatag sa sertipiko sa pagpanag-iya sa una nga unit sa balay ngadto sa komunidad sa Sama-Badjau sa Sitio Panubigon, Barangay Lipata, nga gidumala ni chieftain Dahila Araman.
Gipasiugdahan kaniadtong Marso 21, ang Huy-anan nan Bajau sa Surigao Project (Bajau Housing Project) adunay kinatibuk-ang pondo nga USD300,000 (mga PHP 17 milyon) gikan sa Spanish Agency for International Development (USD250,000) ug UN-Habitat (USD50,000).
Ang unang hugna sa proyekto, nga gitumong para sa unang 20 ka pamilya nga Sama-Badjau, gikatakdang matapos sa Mayo 2025.
