Upat ka Mananagat ang Missing sa Surigao del Norte

Upat ka mga mananagat ang pabiling missing kagahapon samtang ang laing duha naluwas na human sila makasugat og lisod nga kahimtang sa kadagatan sa Surigao del Norte.

Nakig-alayon na ang Philippine Coast Guard (PCG) sa mga hingtungdan nga ahensya sa gobyerno sa search and rescue operations sa upat ka mga mananagat.

Sila si Jesmar Besing, 36, ug Joseph Mapalo, 35, nagdungan og langoy hangtod nga naanod paingon sa Bohol Sea. Giluwas sila sa usa ka lumalabay nga mananagat. Nakaangkon sila og mga samad ug gidala sa ospital aron matambalan.

Ang unom mibiya sa Barangay Canlanipa sa Surigao City niadtong Feb. 28 para sa pagpangisda sa kadagatan sa Limasawa Island.